Breudwd Rhyddiaith Gymraeg 1300-1425
English

Llsgr. Caerdydd 1.363 (Hafod 2) – tudalen 92v

Brut y Brenhinoedd

92v

e gwynỽydedyc wrda hỽnnỽ e wudvgolyaeth a gavssant.
Ac o·dyna o pob parth emkynnvllaỽ a orỽgant e gw+
ascaredygyon brytanyeyt hyt ygkaer wudey. ac
eno ardyrchavael cvstennyn bendygeyt vap kynỽ+
avr en vrenyn a gossot coron e teyrnas am y pen
ac en dyannot rody gwreyc ydaỽ o dyledogyon
rỽueyn er honn a vagassey cỽhelyn archescob. Ac
gwedy atnabot o·honaỽ ef honno try meyb a anet
ydav o·honey. Ac esef oedynt er rey henny. Constans.
ac emreys Wledyc. ac vther pendragon. Ac ena er
rodes ef constans e|map hynaf ydav em mynachloc
amphybalvs egkaer wynt o|y veythryn ac y kymr+
yt mynachaỽl ỽrdas eno. Ar dev ereyll hagen em+
reys ac vther a orchymynnvs y cvhelyn archescob
y ev meythryn. Ac odyna gwedy mynet deg mly+
ned heybyaỽ ef a deỽth vn o|r ffychtyeyt ar ry wuas+
sey en wassanaethvr kyn no henny ydav a megys
kyfrvch neylltvedyc ar brenyn a|vynney y kymryt
em meỽn llwyn ac gwedy gyrrv pavb y vrth avon
e lle honno y lladavd ef a chyllell en dyrybỽd.
AC wrth henny gwedy llad cvstennyn vendyg+
eyt terỽysc ac annvhvndep a kyvodes er rw+
ng e gwyrda pwy a wnelyt en vrenyn. kanys rey
o·nadỽnt a vynnynt vrdaỽ emreys Wledyc en