Breudwd Rhyddiaith Gymraeg 1300-1425
English

Llsgr. Caerdydd 1.363 (Hafod 2) – tudalen 74v

Brut y Brenhinoedd

74v

asclepyodotvs brenyn e brytanyeyt. ac gwedy
bot brwydyr er·rygthwnt e llas asclepyodotvs
ac ed arderchewyt koel o coron e teyrnas. Ac|gwe+
dy kennatav henny y sened rvueyn llawenhav a
orvgant o achavs aghev e brenyn er hvnn a daro+
ed ydav kynnyrfv rvueynyavl kyvoeth. Ac ena
koffav a orvc sened rvueyn e veynt kollet a kolless+
ynt o teyrnget enys prydeyn. Ac wrth henny wynt
a anvonassant constans senedvr er hvnn a darestyg+
hassey er yspaen vrth rvueynyavl vedyant. Gwr do+
eth hagen oed hvnnv a Glew. ac em blaen pob peth
Gwr a|ỽynney aghwanegv kyhoedavc vedyant sened
rvueyn. Ac|vrth henny koel brenyn e|brytanyeyt
gwedy gwybot o·honaỽ en honneyt dyvodedygae+
th constans y enys prydeyn arynegyav ac ofynhav
a orvc emlad en|y erbyn. kanys y clot a kadarnha+
ey na ry allassey vn brenyn gwrthwynebv ydav. Ac
vrth henny y gyt ac e dyskynnvs constans ar tyr er
ynys anvon kennadev a orvc koel at constans ac er+
chy tagnheved ydav  rod  ohonav entev gwry+
ogaeth a darestyghedygaeth ydaỽ ac y sened rv+
ueyn adan er amvot hvn medv ohonaỽ ef enys