Llsgr. Caerdydd 1.363 (Hafod 2) – tudalen 46r
Brut y Brenhinoedd
46r
y* devth blegywryt. a hỽnnỽ ny bỽ yn yr ossoed* na
chynt noc ef nac gwedy koyuyadỽr kystal ac
ef ar rac dahet y caney ac y gwydyat kelỽy+
dyt y mỽssyc y gelwyt ynteỽ dyw y gwareỽ.
AG yn|y ol ynteỽ y deỽth arthỽael y ỽraỽt yn+
teỽ. AG yn ol arthỽael e deỽth eydol. AG yn ol
eydol y deỽth rydyon. AG yn ol rydyon y deỽth
ryderch. AG yn ol ryderch y deỽth sawyl pen
yssel. AG yn ol sawyl y deỽth pyrr. AG yn ol
pyrr y deỽth Gapoyr. AG yn ol capoyr y deỽth
Manogan y ỽap gỽr prỽd a hygnaỽs. Ac y ar p+
ob peth ỽnyaỽn wyryoned yr·rwng y pobyl a wnaey.
AG gwedy marỽ Manogan Bely mavr var* manogan
e deỽth bely maỽr y ỽap en y ol ynteỽ yn ỽre+
nyn. a deỽ ỽgeyn mlyned y gwledychỽs ef ar en+
ys prydeyn. Ac yr bely hỽnnỽ e bỽ try meyb. llwd.
a chasswallaỽn. a nynnyaỽ. A megys y dyweyt rey
o|r kyỽarwydyeyt pedweryd map a|wu ydaỽ lleve+
lys. A llỽd oed hynaf o|r rey henny. a hỽnnỽ gwedy ma+
rỽ y tat a kymyrth llywodraeth y teyrnas. Ac odyna
y bỽ gogonedỽs adeylyaỽdyr keyryd a|chestyll. ef
a atnewydỽs mỽroed llỽndeyn. ac anryỽedyc tyroed
| « p 45v | p 46v » |