Breudwd Rhyddiaith Gymraeg 1300-1425
English

Llsgr. Caerdydd 1.363 (Hafod 2) – tudalen 187r

Brut y Brenhinoedd

187r

kylchynỽ. Ac yr henny ny mynnỽs medravt
peydyaỽ ar hynn a dechrevassey namyn kan an+
noc y wyr eỽ gossot en vydynoed a mynet allan
o|r dynas y ymlad en erbyn y ewythyr. Ac|gwedy
dechreỽ ymlad o pob parth aerỽa ỽaỽr a gwna+
ethant. ac eyssyoes mwyhaf wu em pleyt vedra+
ỽt. ac en dypryt kymhell arnaỽ adaỽ e mays. Ac
odyna hep dydorbot pa wed e kledyt e kalaned ffo
a orỽc partha* a chernyw. Ac|wrth henny arthỽr
en ovalỽs en ỽaỽr ac en pryderỽs o achaỽs y ry dya+
nk mor ỽynych a henny y kanthav. en e lle ef a|e hym+
lynỽs hyt e wlat honno. hyt ar glann kamlan en|e lle
ed oed vedraỽt en|y arhos. Ac|wrth henny   +
 medraỽt megys ed oed glewhaf a gwychraf y ky+
rchv en|e lle gossot y ỽarchogyon en vydynoed kanys
gwell oed kanthaỽ y lad neỽ orỽot noget ffo a vey h+
wy no henny. kanys ed oed ettwa kanthaỽ o eyryf
nyver try vgeyn myl. Ac o henny e gwnaeth ef ch+
wech bydyn. ac em pob vn e gossodes chwe gwyr a try
ỽgeynt. a chwe|chant a chwe myl o wyr arvavc. Ac
o|r rey ereyll y am henny ef a gwnaeth bydyn ydav
e|hvn. ar rody llywdryon* y pob vn o|r bydynoed ereyll.