Breudwd Rhyddiaith Gymraeg 1300-1425
English

Llsgr. Caerdydd 1.363 (Hafod 2) – tudalen 158v

Brut y Brenhinoedd

158v

dyev a fforesteỽ en|y thekaỽ. Ac y gyt a
henny adeyladeỽ a llyssoed brenhyaỽl
endy o|y meỽn. a they eỽreyt megys nat oed
en e teyrnassoed tref a kynhebygyt y rvue+
yn o|r ryodres namyn hy. Ac y gyt a henny ar+
derchavc oed o dwy eglwys arpennyc. ỽn ona+
dvnt en ardyrchaỽedyc en anryded Wl ỽerthyr
a chwuent o werydon en talỽ molyant y dyw en+
dy en wastat dyd a nos en anrydedỽs ỽrdasseyd.
Arrall oed en anryded aaron kytymdeyth e
merthyr hvnnỽ a chwuent en honno o canow*+
yr ryolavldyr*. ac y gyt a henny tryded eysted+
va archescop a phennhaf en enys prydeyn oed.
Ac y gyt a henny heỽyt arderchaỽc oed o deỽ k+
ant escol o athraon a doythyon a etnebydynt
kerdedyat e ssyr ar amravalyon kelỽydodeỽ
ereyll. kanys en er amser hỽnnỽ e kenyt endy
o|r seyth kelvydyt. ar rey henny trwy kerded+
yat e ssyr a vynegynt y arthvr llawer o|r
damwennyeỽ a delynt rac llaỽ. Ac o|r achwy+
ssyon henny oll e mynnỽs arthỽr eno daly e
llys. Ac o·dyna gwedy ellwng kennadeỽ trwy
amraỽalyon teyrnassoed Gwahaỽd paỽb