Breudwd Rhyddiaith Gymraeg 1300-1425
English

Llsgr. Caerdydd 1.363 (Hafod 2) – tudalen 12v

Brut y Brenhinoedd

12v

yr rey ry ffoassey y gyt ac antennor pan wu dy+
stryw tro. a choryneỽs yn teyssawc arnadỽnt.
Gwr hynaỽs oed hỽnnỽ. a goreỽ kyghorỽr oed
a dewraf a glewhaf o|r gwyr. Ac o bey ymturaỽ
neỽ ymhwrd yg·rygthaỽ ef ac ỽn o|r kewry yr ỽ+
ey y dewret ef a orỽydey arnaỽ megys kyt bey
mab ỽydey. Ac gwedy ymatnabot onadỽnt a gw+
ybot eỽ hanỽot o ỽn kenedyl wynt a ymkytem+
dethyokassant y gyt. ac ef ar pobyl a oed y gyt ac
ef. Ac o enỽ eỽ tewyssaỽc y gelwyt y kenedyl hon+
no corneỽeyt yr hynny hyt hedyw. Ac y gyt a br+
ỽtỽs yn kanhvrthwyỽr ydaỽ ym pob lle ac ym pob
kyfranc. Ac odyna y gyt y doethant hyt yn angyw
a hyt ym porth lygeyr. ac yno y bwryassant ang+
horeỽ allan. ac y gorffwyssassant yno wyth nos ac
edrychassant anssaỽd y teyrnas honno
AC yn yr amser hỽnnỽ yd oed Goffar ffycty yn
ỽrenyn yn y wlat honno. Ac gwedy klybot o·h+
onaỽ ef ry dyskynnỽ llyghes o estraỽn kenedyl ar ter+
ỽyn y teyrnas ef. annỽon kennadeỽ a orỽc ynteỽ y
ssyllỽ ac y wybot pa peth a ỽynnynt. a|e ryỽel. a|e
hedỽch. Ar kennadeỽ hynny a kyrchassant parth
at y llogheỽ. Wynt a kyỽarfỽant a choryneỽs.