Llsgr. Caerdydd 1.362 (Hafod 1) – tudalen 71r
Brut y Brenhinoedd
71r
ar heil mynych ar anregionn Ac ỽedy kaffa+
el gỽybot hynny o|r iarll y gỽr hitheu. llitiaỽ a|oruc
ac yn diannot adaỽ y llys heb ganhat y|brenhin.
A chymeit* vu y lit ac na allỽyt y ymchoelut
tracheffyn rac ofyn kolli y wreic. yr hon a|garei
ynteu yn vỽy no dim daeraỽl*. Ac ỽrth hynny lli+
diaỽ a oruc y brenhin am adaỽ y lys heb ganhat.
Ac anuon yn|y ol y erchi idaỽ dyuot y wneuthur
iaỽn. yr brenhin. kans vn o saraedeu yỽ adaỽ
y lys heb y ganhat. A gỽedy nat ymchoelei
yr neb. tygu a|wnaeth y brenhin trỽy y lit yd
anreithei gyuoeth gorleis. Ac yna heb vn gohir
tra yttoed y lit yn parahu*. Kynnullaỽ llu maỽr
a|wnaeth y brenhin. A chyrchu kernyỽ a dechreu
llosci y dinassed ar kestyll. Ac yr hynny eissoes
ny|lauassỽys Gorleis ymerbynneit ac ef. kans
llei oed y nifer. no niuer y brenhin. Ac|ỽrth hynny
sef y kauas yn|y gyghor kadarnhau y gestyll. Ac
velly arhos porth o iwerdon attaỽ. A chan oed mỽy
y ofyn am y wreic noc ymdanaỽ e|hun. Sef a|w+
naeth y gossot hi yg kastell tintagol ar lan y tra+
eth yn|y kydarnaf yn|y gyuoeth. Ac ynteu e|hun
a|aeth y kastell dimlot. rac eu kaffael ell deu y
gyt. A phan gigleu y brenhin hynny. Sef a wna+
eth ynteu mynet parth ar kastell yd oed gorlois
yndaỽ. A gỽedy y gylchynu dechreu ymlad ac ef.
a|e warchae mal na chaffei neb dyuot ohonaỽ na
mynet idaỽ. A gỽedy mynet ỽythnos heibaỽ. kof+
fau a oruc vthyr garyat eigyr. A galỽ vlphyn
| « p 70v | p 71v » |