Breudwd Rhyddiaith Gymraeg 1300-1425
English

Llsgr. Caerdydd 1.362 (Hafod 1) – tudalen 47v

Brut y Brenhinoedd

47v

yn kymraec duỽ . Ac yn nessaf y hỽnnỽ
yd enrydedỽn i y dỽyes kyuoethoccaf o|r dỽysseu.
yr hon effream. Ac y honno y kyssegrỽys an ri+
eni ni y chechet* dyd o|r ỽythnos; Ac yn an eith*
ni y gelwir ffriday. Sef yỽ hynny duỽ gỽener.
yna y dywaỽt gỽrtheyrn. am aỽch cret chỽi yr hon
y ssyd iaỽnach y galỽ yn aghyret noc yn gret.
dolurus yỽ genyf|i. llawen yỽ genyf ineu ych
dyuodedigyaeth. kanys ny bu reidach yni eiri+
oet. kanys vy gelynyon y ssyd ym kywarssagu
o pop parth. Ac o mynỽch chỽitheu kylauuryaỽ*
a minheu ỽrth ymlad am gelynyon; minheu
aỽch keuoethogaf chỽittheu o|tir a dayar ac eur
ac aryant a da arall. Ac yn diannot ufydhau
a wnaethant y hynny. A gỽrhau yr brenhin.
A thygu fydlonder idaỽ. Ac yn|y lle nachaf y
ffichteit yn dineu o|r alban a llu diruaỽr y veint
gantunt ac yn anreithaỽ y gỽladoed. A phan
gigleu ỽrtheyrn hynny kynnullaỽ y varchogy+
on a|wnaeth ynteu a mynet yn eu erbyn. A gỽe+
dy dyuot y deu lu y gyt ac ymlad; ny bu reit
hayach yr kiỽtaỽtwyr ymlad y dyd hỽnnỽ. kanys
y saesson a ymladassant yn kyn|ỽryolet. Ar ge+
lynyon a oedynt yn pylu y kiỽtaỽtwyr hyny
uu reit udunt ymchoelut ar ffo yn gewilydus.
A Gỽedy kaffel o ỽrtheyrn y vudugolyaeth
honno trỽy nerth y saesson; ynteu yn|y
lle a amlaỽys rodyon udunt ỽynteu. Ac y
hengyst y rodes ef yn sỽyd lindesei tir a day+
ar