Breudwd Rhyddiaith Gymraeg 1300-1425
English

Llsgr. Caerdydd 1.362 (Hafod 1) – tudalen 37r

Brut y Brenhinoedd

37r

y|dawei y gyuoeth gỽedy ef. kanyt oed etiued idaỽ nam+
yn vn verch. rei a gyghorei idaỽ rodi y verch y vn o dy+
lyedogyon rufein a|e gyuoeth genthi  mal y gell+
it kynhal y teyrnas yn tagnouedus gadarn rac llaỽ
Ereill a gyghorei idaỽ rodi y verch y vrenhin o wlat
arall ac eur ac aryant digaỽn genthi a rodi y gyuo+
eth y kynan meiriadaỽc y nei. Ac eissoes cradaỽc iarll
kernyỽ a|e kynhores* ef y roi y verch a|e gyuoeth gỽe+
dy ef y vaxen wledic kans o|hynny y tybygei ef kaffel
tragywydaỽl hedỽch kans mab oed vaxen y lywelyn
ewythyr y|elen luydyaỽc y vam ynteu a hanoed o dy+
lyedogyon rufein. Ac ar vyrder o vrenhinaỽl gendyl*
y hanoed a chynhyruu y llys a oruc kynan yn vaỽr
am roi y kyghor hỽnnỽ yr brenhin. kans y vedỽl ef oed
gaffel y vrenhinyaeth. Ac ỽrth hynny adaỽ y llys trỽy
eirlloned. ac yna eissoes anuon a|wnaeth cradaỽc veu+
ruc y vab oed ỽr maỽrdec clotuaỽr o haelder a deỽred
a phy|beth bynac a|dywetei ef a|e kadarnhaei o|e korff
a* arueu. A gỽedy dyuot meuruc rac bron maxen. kym+
eredic vu ganthaỽ ymlaen paỽb. sef yd oed yna ter+
uysc maỽr a ryfel rỽg maxen a|e deu vroder gracian
a valaỽnt. kans y rei hynny a daroed gỽrthlad max+
en o|r tyrted* ran o|r ymherodraeth. a hynny oed ỽrthrỽm
gantaỽ. A phan welas meuruc y vot yn gywarsyge+
dic gan y vrodyr. sef y|dywaỽt Meuruc ỽrthaỽ yr
ymadraỽd hyn. Maxen heb ef paham y diodefy ti ty
tremygu val hyn. a fford yt y ymwaret dabre y y+
nys prydein a chymer coron y teyrnas. kans eutaf
vrenhin yssyd hen a chlauus. ac nyt oes a damuno