Breudwd Rhyddiaith Gymraeg 1300-1425
English

Llsgr. Caerdydd 1.362 (Hafod 1) – tudalen 14r

Brut y Brenhinoedd

14r

vyỽ ef. A gỽedy y bei uarỽ ynteu. y kyuoeth oll yn
deu haner y·rydunt. Ac yna gỽedy clybot o aga+
nipus vrenhin freinc clot a phryt a theghỽch corde+
ila. Anuon kennadeu a|wnaeth hyt ar lyr y|that
o|e erchi yn wreic idaỽ. Ac y dywaỽt ynteu lyr y
rodei y verch idaỽ heb argyureu a heb da genthi yn
llawen. kan daroed idaỽ ynteu rodi y gyuoeth a|e
eur a|e aryant yr dỽy verchet ereill. A gỽedy me+
negi hynny y aganipus; o garyat y uorỽyn ef a
anuones y genhadeu tracheuyn y dywedut bot i+
daỽ ef digaỽn o eur ac aryant a chyuoeth. Ac
nat oed reit idaỽ ỽrth dim. namyn kaffel gỽreic
vonhedic telediỽ dylyedaỽc y kaffei etiued o·ho+
nei a gynhalei y gyuoeth gỽedy ef. kans ef bie+
wed y tryded ran o ffreinc. Ac yn diannot cordei+
AC ympen yspeit [ la a rodet y aganipus.
ygkylch diwed oes llyr. A dechreu llescu o·ho+
naỽ o heneint. y deu racdywededigyon douyon a|we+
rescynassant arnaỽ y gyuoeth. yr hỽn a gynhaly+
assei ef yn ỽraỽl trỽy hir amser. Ac a|e rannassant
y·rydunt yn deu hanner. Ac o gyt·duundeb eissoes
maglaỽn tywyssaỽc yr alban a gymyrth llyr attaỽ
ar y deugeinuet marchaỽc. rac bot yn gewilyd gan+
taỽ vot heb varchogyon ỽrth escord. A gỽedy bot
llyr velly gyt maglaỽn yspeit dỽy vlyned; llidyaỽ
a oruc Coronilla y verch ỽrthtaỽ rac meint oed o
varchogyon y gyt ac ef. A rac eu gỽssanaethwyr
yn|teruyscu y llys. A dywedut a wnaeth ỽrth y gỽr
vot yn digaỽn ugein marchaỽc ygyt a|e that