Breudwd Rhyddiaith Gymraeg 1300-1425
English

Llsgr. Caerdydd 1.362 (Hafod 1) – tudalen 10v

Brut y Brenhinoedd

10v

golyaeth honno; ranu yr yspeileu a oruc rỽg y ge+
tymdeithon heb adaỽ dim idaỽ e|hun eithyr teir mory+
nyon enryued eu pryt ac eu tegỽch a gauas yn|y llog+
eu. Ar penhaf o|r teir morỽyn hynny oed verch y vre*+
hin germania. Sef oed eu henỽ y vorỽyn; essyllt;
Ac nyt oed haỽyd* kaffel dyn kyn|deccet a|hi yn yr
holl vyt. Gỽynach oed y chnaỽt no|r echtywynedic
ascỽrn moruil. A diruaỽr serch a charyat a dodes locri+
nus erni. A mynnu y chymryt y wreic gỽely idaỽ.
A gỽedy gỽybot hynny o gorineus. llityaỽ a oruc. ka+
nys|kyn no hynny ry wnathoed locrinus ammot y gym+
ryt y verch ef y vreic idaỽ. A dyuot a oruc corineus
dan treglaỽ* bỽyall deu uinyaỽ* yn y laỽ deheu ar lo+
crinus gan dywedut yr ymadraỽd hỽn. A|e velly locri+
nus y teli ti imi y saỽl vratheu a gỽelieu a gyme+
reis i dros ty tat ti. tra uum yn kynydu tir idaỽ. ky+
mryt alltudes hediỽ yn wreic itt ny ỽdost o py le pan
henyỽ. A gỽrthot vy merch inheu. Ednebyd hagen
na byd prytureth* itt hynny na diprit tra vo y nerth
yn|y vreich deheu hon. yr hon a|ladaỽd y saỽl gewri
ar traetheu ynys prydein. Ac y velly y gogyuada+
ỽd yn vynych dan dreiglaỽ y vỽyall. Ac eissoes yd
aeth kydymdeithon y·rydunt. Ac y tagnouedỽyt.
A chymell ar locrinus kymryt merch corineus yn
wreic idaỽ. Ac y kyscỽys locrinus gan wendoleu
verch corineus. Ac yr hynny eissoes ny lauassỽys
caryat essyllt gantaỽ ef. manyn* y gossot y meỽn
daerdy yn llundein. Ac annỽyleit idaỽ yn|y gỽassa+
naethu yn dirgel. Ac yno y daỽei ynteu yn rinya+
ỽc attei.