Breudwd Rhyddiaith Gymraeg 1300-1425
English

Llsgr. Caerdydd 1.362 (Hafod 1) – tudalen 104r

Brut y Brenhinoedd

104r

 n yn wreic idaỽ gỽedy y gymot a pheanda.
A gỽedy llywaỽ o kawalaỽdyr y teyrnas trỽy ys+
peit deudec mlyned yn ỽraỽl trỽy hedỽch. yna y
cleuychỽys o ryỽ nychtaỽt. Ac o|r achaỽs hỽnnỽ ky+
uodi teruysc y·rỽg y brytanyeit e hunein. ar wlat
ffrỽythlaỽn a distrywyssant oc eu hyscymun teruysc.
Ac y gyt a hynny heuyt ryỽ direidi arall a doeth
arnadunt y dial o duỽ arnadunt eu pychodeu. Ac sef
oed hynny diruaỽr newyn a thymhestyl a marwoly+
aeth ym pop gwlat dros ỽyneb ynys prydein yn
gyffredin hyt na cheffit na bỽyt na diaỽt nam+
yn ychydic y neb a allei hely yn|y diffeithỽch. ar
varỽolyaeth a oed kymeint ac na allei y rei bu gla+
du y rei meirỽ. Ac ỽrth hynny sef a|wneynt my+
net y wladoed ereill o|r byt yn|y cylch. Ac adaỽ eu
gỽlat e|hun yn diffeith gan ỽylouein yn|y wed hon.
Arglỽyd holl gyuoethaỽc nef a dayar ti an rodeist
ni megys deueit yn vỽyt bleideu. Ac an gascereist*
ym plith alltudyon. Ac yn·y kyweiryỽys katwa+
laỽdyr e hun lyghes. Ac y kychwynnỽys parth a
llydaỽ gan achwanegu y ryỽ gỽynan* hon. Gỽae
ni pechaduryeit am an pechodeu. trỽy y rei y codas+
sam duỽ. kany ny chymarassam penyt tra yttoedem
yn kaffel yspeit y penydyaỽ. ỽrth hynny hediỽ y
mae duỽ yn dial arnam ninheu hynny hediỽ. Ac
yn dyrru oc an ganedic dayar. kany ny allỽys
vn genedyl o|r byt an dyrru. tra yttoed duỽ y gyt
a ni. Ac ỽrth na allỽys neb an dihol. y mae ynteu
pan yn dihol ni o tref an tat o achaỽs an pechodeu.