Breudwd Rhyddiaith Gymraeg 1300-1425
English

LlB Llsgr. Cotton Titus D IX – tudalen 56r

Llyfr Blegywryd

56r

ỽl. heb gaeth. heb alltut. heb ledach yndaỽ.
Gerth bilaein brenhin yỽ; teir|bu. a|th+
rivgein mu gan tri drychauel. Y sarha+
et yỽ; teir bu a|thriugeint aryant.
Galanas bilaein breyr yỽ hanheraỽc
vyd ar|alanas bilaein brenhin. ac velle
y|sarhaet. Galanas alltut brenhin yỽ;
teir bu. a|thriugeint mu heb dyrchauel.
Y sarhaet yỽ teir|bu heb achwannec. G  ̷+
erth alltut breyr. yỽ; hanner gỽerth allt+
ut brenhin. a|e sarhaet velly Gerth
alltut bilaein yỽ; hanner gỽerth alltut
breyr. a|e sarhaet velly. BRenhin a|geiff
trayan pob galanas o|r a|gymhello lle
ny allo kenedyl y|gymell. ac a|gaffer o|da
y|r llourud o|r pryt y|gilyd y|brenhin biei+
vyd. Pvnt a|hanner yỽ; gỽerth caeth
tra mor. Os o|r ynys honn yd|henuyd;
punt vyd y|werth. ac velly os annafus.
neu ry|hen. neu ry|ieuanc. nyt amgen.
llei noc vgein mlỽyd. punt yỽ y werth.
a deudec keinnaỽc yn|y sarhaet. whe ch+
einnaỽc dros|teir llath o vrethyn gỽyn
y wnneuthur peis idaỽ. a|their keinnaỽc
dros laỽdyr. a cheinnaỽc dros guaran+
eu idaỽ. a|dyrrnnoleu. Vn dros vdyf.