LlB Llsgr. Cotton Titus D IX – tudalen 29v
Llyfr Blegywryd
29v
ynn|y nodua; Seith punt a|telir. Hanner y ̷
punoed hynny a|daỽ y|r abat os kyureitha+
ỽl vyd ac eglỽyssic llythyraỽl. a|r|hann ̷+
er arall a|daỽ y|r offeireit a|r kynnhonnỽ ̷+
yr a|vwynt yn gwassannaethu duỽ yno.
Y|ryỽ rann honn a|vyd rỽg yr abbat a|r
kynnhonnwyr o|r ymlad a|wnel y|naỽdỽ+
yr a|gymerwynt naỽd y gan yr offeireit
a|r abbat. ac velly y|rennir pob peth o|r a
del y|r sant o offrỽm. ac nyt y allaỽr.
nac y|neb arall. O|ymlad a|wnnelher yn
llys lle y bo eistedua brenhin. distein a|di ̷ ̷+
chaun bot yn haỽlỽr. os yr ymladwyr
ny chwynnant. canys torri tagnef y|llys
yỽ. Ny disgyn camlỽrỽ o|ymlad onyt
trỽy tystolyaeth ny aller y|llyssu. a|tyster
trỽy ymhaỽl. O|ymlad a|wnelher y|my+
ỽn nodua; gỽaet. neu gleis. a seif yn ̷ ̷
tystolyaeth y|r abbat. ac y|r offeireit. trỽy
vreint eglỽyssic yr abbadaeth. O|r byd
ymlad yn llys peunydyaỽl y brenhin;
dirỽy pob vn o|r ymladỽyr heb wadu o ̷
vn ohonunt yn erbyn y gilyd. nac yn
erbyn y distein; whephunt vyd. Os o|va+
es y|r llys y|byd; teir punt vyd. O|r palla
reith y|r neb a|watto ymlad; dirỽyus vyd
| « p 29r | p 30r » |