LlB Llsgr. Cotton Cleopatra B V rhan i – tudalen 83v
Brut y Brenhinoedd
83v
o ynys brydeyn oed caer llion ar wysc yna.
Ac yna y perys arthur darparu gwlet anveidraul
y veynt y ssulgwyn; ac anvon kennadeu y bop gwlat
y wahawt y brenhinet ar ieirll ar barwnyeit ar
marchogyon vrdolyon. a gwyr da ereill adwyn ar
ny ellit ev rif am law hynny. y dyuot y gaer llion
y rodi ydunt breiniev goreu a gausseint erioed
val y dangossei ev boned ac ev delyhet ac ev gwaet.
Ac yna y doeth o|r alban arawn vab kynvarch bren+
hin yscotlont. ac vrien vab kynvarch brenhin re+
get. Ac o wyned casswallawn llaw hir. a meuric
brenhin dyvet. a chatwr iarll kernyw. Ar tri arch+
esgob o ynys brydein. A phennaf onadunt oed arch+
escob caer llion; canys breint legat a oed idaw. a
gwr nefawl oed. Ac yno y doeth morud iarll caer
loew. a mor iarll caer vrangon. ac anarawt o am+
withic. a marchud o gaer weir. ac ywein o gaer
vallawc. nev ssalysburi o ieith arall. Gwrssalem
o gaer gynvarch. ac vrien o gaer vadon. a Jona+
thal o dorcestyr. a bosso o ryt ychen. a dunawt vab
pabo post prydein. kenev vab coel. Peredur vab
pruth. Grufud vab nogoed. Regyn vab klawd.
kynvarch. Gorbonyawn. Edelem vab kolodawc.
kyngar vab angen. Maxwic klof. Rvn vab nw+
rthon. Gwrgant. Gweir. Catvan. ac y·gyt a hyn+
ny llawer o wyrda ereill; a vydei ryvlin ev rif+
aw. O|r ynyssoed ereill y doeth Gillamwri bren+
hyn iwerdon. a gillamwri arall brenhin alont.
a doldaf brenhin gotlont. a gwinwas brenhin
| « p 83r | p 84r » |