Breudwd Rhyddiaith Gymraeg 1300-1425
English

LlGC Llsgr. 24049 (Boston 5) – tudalen 63

Llyfr Blegywryd

63

gỽanas hẏnnẏ. o·d|a dẏn arnaỽ mal ẏ|bo
marỽ; traẏan ẏr alannas a a berchenn+
aỽc ẏ|gỽaẏỽ. TRi ouer ẏmadraỽd a|dẏ+
ỽedir ẏn llẏs; ac nẏ ffẏnnẏant. gỽat k+
ẏn deturẏt. A llẏs kẏn amser. A|chof. a
chẏghaỽs gỽedẏ braỽt. TRi ouer llae+
th ẏssẏd. LLaeth cath. A|llaeth gast. A|llae+
th cassec. nẏ diwẏgir dim ẏmdanadunt.
TREir sarhaet nẏ diwẏgir o|r keffir
trỽẏ veddaỽt; Sarhaet offeirat teulu.
Ac ẏ ẏgnat llys. ac ẏ|vedẏc. Kannẏ dẏl+
ẏant vot ẏn veddỽ vẏth. A channẏ wdant
ỽẏ amser ẏ|bo reit ẏ|r brenhin wrthunt.
Teir paluaỽt nẏ diwẏgir; vn arglỽẏd ar
|wr ẏnn|ẏ reoli ẏn|dẏd kat a|brwẏdẏr.
Ac vn tat ar||vab ẏnn|ẏ gosbi. Ac vn
penkenedẏl ar||gar ẏnn|ẏ gẏghori. 
T Eir gwraged a|dẏly eu meibon
tref eu mameu. gỽreic a|rother
tros ẏ|that ẏ|gỽẏstẏl. A|chaffel
mab ohonei ẏnn|ẏ gỽẏstlorẏa+
eth. A gỽreic a|rother o|rod kenedẏl ẏ allt+
ut. A gỽreic gỽr o|e chenedẏl. a|dial o|M+
ab hỽnnỽ. nẏ dẏlẏir ẏ|oedi am tref ẏ|vam.
nac aros naỽuettẏdẏeu ẏnn|ẏ erbẏn.