Breudwd Rhyddiaith Gymraeg 1300-1425
English

Llsgr. Bodorgan – tudalen 77

Llyfr Cyfnerth

77

gỽystyl. y golli. ny dyly y talaỽdyr y gan+
taỽ namyn dimei trachefyn. kanys hyn+
ny yỽ trayan keinhaỽc. kyfreith. Ac ynteu e
hunan a lygrỽys breint y ỽystyl. O|r dy+
ry mach peth maỽr yg gỽystyl peth by+
chan. yr haỽlỽr a dyly y gymryt. A chyn
coller kyn yr oet. nys diỽc yr haỽlỽr yr
mach  trachefyn namyn y trayan.
y mach hagen ae diỽc yr kynnogyn yn gỽ  ̷+
byl. kanys yn aghyfreithaỽl y duc ef.
O|r dyry kywerthyd kynnogyn punt yg
gỽystyl keinhaỽc ae dygỽydaỽ. ny diwy+
gir idaỽ dim.
POp dadyl yn| y hamot. nyt amot heb
amotwyr. Vn diwat yỽ amot a mech+
niaeth. Ny dyly neb wneuthur amot dros
y gilyd heb y ganhat na that dros y vab
na mab dros y tat. kany phara amot o+
nyt yn oes y neb ae gỽnel. kyn gỽneler
amot yn erbyn kyfreith; dir yỽ y gadỽ.
Amot a tyrr ar dedyf. Trech amot no
gỽir. O|r edeu dyn da y arall yg gỽyd
tyston. A mynnu eilweith y wadu. nys
dichaỽn onyt y tyston a palla yr llall.