Breudwd Rhyddiaith Gymraeg 1300-1425
English

Llsgr. Bodorgan – tudalen 51

Llyfr Cyfnerth

51

Messur gỽestua brenhin o pop tref y taler
gỽestua brenhin o·honei. Pỽn march
o vlaỽt gỽenith ac ych. A seith drefn o geirch
vn rỽym. Ac a vo digaỽn yn vn gerỽyn o vel.
Naỽ dyrnued uyd vchet y gerỽyn pan vessur+
rer ar ỽyr o|r cleis traỽ yr emyl yma. A phedeir
ar hugeint aryant. Punt yỽ gỽerth gỽest  ̷+
ua brenhin. whe ugeint yg kyfeir y vara.
A thrugeint dros y enllyn. A thrugeint dros
y llyn. Sef y telir uelly hagen. ony rodir y
bỽyt yn| y amser nyt amgen y gayaf. O tref
maeroni neu gyghelloryaeth; med a telir.
O tref ryd dissỽyd; bragaỽt a telir. O  tay+
aỽctref; cỽrỽf a telir. Dỽy gerỽyn vragaỽt
neu pedeir cỽrỽf a telir dros vn ved. Dỽy ge+
rỽyn gorỽf a telir dros vn vragaỽt. Ny the+
lir aryant nac ebran meirch gan westua haf.
Deu daỽnbỽyt a daỽ yr brenhin yn| y ulỽydyn
y gan y tayogeu. Daỽnbỽyt y gayaf yỽ hỽch
tri vyssic yn| y hyscỽyd. Ac yn| y hireis. Ac yn| y
chlun. A henherhob hallt. A thrugeint torth
o vara gỽenith o|r tyf gỽenith yno. bit beill+
eit y| naỽ torth. whech yr neuad ar teir yr ysta+
uell. kyflet pop torth ac o elin hyt ardỽrn.